သည်းခံခြင်း ခန္တီတရားနှင့်စပ်၍
အတုယူဖွယ်ကောင်းလှသော အရှင်ပုဏ္ဏမထေရ်၏
နှလုံးသွင်းပုံ အကျဉ်းချုပ်ကို ဖော်ပြပေအံ့။
မြတ်စွာဘုရား လက်ထက်တော်အခါက
အရှင်ပုဏ္ဏမထေရ်သည် (သုနာပရန္တ ဇနပုဒ်) တောရွာတစ်ရွာသို့ သွားရောက်နေထိုင်လိုပါကြောင်း လျှောက်ထားသည်တွင်၊ မြတ်စွာဘုရားက ချစ်သားပုဏ္ဏ ထို တောရွာသားတို့သည် ကြမ်းတမ်းရုန့်ရင်းကြ ကုန်၏၊ အကယ်၍ ထို တောသားတို့က သင့်ကို ဆဲဆိုခြင်းအမှု ပြုခဲ့လျှင် သင်၏စိတ် မည်ကဲ့သို့ဖြစ်မည်နည်းဟု မေးတော်မူသောအခါ-
အရှင်ပုဏ္ဏမထေရ်က မြတ်စွာဘုရား ထိုသူတို့သည် ဘုရားတပည့်တော်ကို ဆဲဆိုခြင်းအမှု ပြုကြကုန်ငြားအံ့၊ ဤသူတို့သည် လူကောင်းများသာဖြစ်ကြသည်၊ အထူးကောင်းသော လူများသာဖြစ်ကြသည်၊ ငါ့ကိုဆဲဆိုရုံမျှသာ ဆဲဆိုကြသည်၊ လက်သီးဖြင့်ထိုးခြင်း တတောင်ဖြင့်ထောင်းခြင်း အမှုကို မပြုကြရှာသေးပေဟူ၍ ထိုသူတို့အပေါ်မှာ လူကောင်းများဟူ၍ နှလုံးသွင်းလျှက် အမျက်ဒေါသကို သိမ်းဆည်းသည်းခံပါမည် ဟူ၍ လျှောက်ထားလေသည်။
တဖန် မြတ်စွာဘုရားက ချစ်သားပုဏ္ဏ ထို တောရွာသားတို့သည် လက်သီးဖြင့်ထိုးခြင်း တတောင်ဖြင့်ထောင်းခြင်းအမှုကို ပြုကြကုန်လျှင် သင်၏စိတ် မည်ကဲ့သို့ဖြစ်မည်နည်းဟု မေးတော်မူသောအခါ-
အရှင်ပုဏ္ဏမထေရ်က မြတ်စွာဘုရား ထိုသူတို့သည် ဘုရားတပည့်တော်ကို လက်သီးဖြင့်ထိုးခြင်း တတောင်ဖြင့်ထောင်းခြင်းအမှုကို ပြုကြကုန်လျှင် ဤသူတို့သည် လူကောင်းများသာဖြစ်ကြသည်၊ အထူးကောင်းသော လူများသာ ဖြစ်ကြသည်၊ ငါ့ကိုလက်သီးဖြင့်ထိုးခြင်း တတောင်ဖြင့်ထောင်းခြင်း အမှုကိုသာ ပြုကြသေးသည်၊ ခဲဖြင့် မထုကြသေးပေဟူ၍ ထိုသူတို့အပေါ်မှာ လူကောင်းများဟု နှလုံးသွင်းလျှက် အမျက်ဒေါသကို သိမ်းဆည်းသည်းခံပါမည်၊ အစရှိသည်ဖြင့် ထိုသူတို့က အသက်ဆုံးအောင် သတ်ဖြတ်ကြစေကာမူ ငါ့မှာအရ တော်လေစွ အရှင်ဂေါဓိက အရှင်ဆန္န အစရှိသည်တို့မှာ မိမိကိုယ်ကို ကိုယ်တိုင် သတ်ဖြတ်ခြင်း ပြုကြရသေးသည်၊ ငါ့မှာ မပြုရပဲ ရပေသည်ဟု နှလုံးသွင်းလျှက် အမျက်ဒေါသကို သိမ်းဆည်းသည်းခံပါမည် ဟူ၍ လျှောက်ထားသည်တွင် မြတ်စွာဘုရားက သာဓုကောင်းချီး ခေါ်တော်မူသည်။
သူတော်ကောင်းတရားများ လွယ်ကူစွာ လေ့လာနိုင်ရန် ဤအ၀ိုင်းလေးများ အတွင်းမှာ တရားစာများ တရားပုံများကို သွပ်သွင်းထားပါတယ် သင်တို့ စိတ်တိုင်းကြ ကူးယူဖြတ်တောက် လွတ်လပ်စွာ အသုံးပြုနိုင်ပါတယ်။
Subscribe to:
Post Comments (Atom)
No comments:
Post a Comment